Mitshena aimuna uetshipaniti nete mishtikushiu-aimunit kie nete akaneshau-aimunit. Tshitauiashunan (emprunt) neni aimuna tshipa tshi issishuenan. Takuana neni aimuna anite tshinanu, muku nanikutini, apu tshissenitakuaki katshi utinakaniti nete ait aimunit, usham miam innu-aimuna eshi-pimipanitini.
Tshitapatamuku ume tipatshimuniss:
Atauitshuapit nika ituten tshishi-atusseiani, eukuan ume tshe ui itataueian : peikussimuteush napatata, meshishtit teshu (neshu), nishunatamata. Nui nashupitshen utakussiti mak nika nekaututshen.
| napatata | = | la patate |
| teshu | = | des choux |
| natamata | = | la tomate |
| nui nashupitshen | = | la soupe |
| nika nekaututshen | = | le gâteau |
Ume kutak ashit tshitapatamuku tipatshimuniss :
Akaneshau ui pushipan netupissa, ui natshi-pinakutsheu, nete nesseshepit metuenannu.
| akaneshau | = | anglais |
| netupissa | = | l’autobus |
| ui natshi pinakutsheu | = | bingo |
| nesseshepit | = | les cégeps |
Umeni kutaka aimuna ka auiashunanuti : pushukateu, kapi, napien, papinaman…
Eukuan eshinakuak tshitaimunnan, eukuan eshi-pimipanit. Takuana kutaka aimuna ka utshipaniti nete mishtikushiu-aimunit mak passe akaneshau-aimunit, anutshish passe auiashunanua mak passe shashish neni takuana.
Kassinu anite aimuna eshi-aiminanuti assit, eukuan eshi-pimipaniti iapit, auiashuat kie uinuau ait aimunit nenua aimuna, mate ne mishtikushiu-aimun pacane, innu-aimunit utshipanu : pakan kie ne chicoutai, innu-aimunit iapit utshipanu : shikuteu.