Mishta-shashish ute innuat eshpish taht. Shashish uet ashu-patshitinahk utaitunuau kie utaimunuau, utauassimuaua kie ussimuaua manaht. Aianishkat, nanitam eshk^u tshika tau innu muk^u ua ishinakushit, muk^u ua ishinniut kie muk^u ua ishi-aimit. Mishta-shutshishikupan tapue katshi shaputueshkak kie nikanutet, inniunnu niashatak.

Ume pishim^u, ishi-tshissinuatshitakanu miam innu-aimun-pishim^u. Ui kanapua uapatiniuenanu eshpish ishpitenitakuak innu-aimun. Nutim ute eshpitashkamikat assit etatiki innu-aimuna. Anutshish, etatu ui ishpitenitakanu innu-aimun. Anu mitshena mashinaikana ennushteti, anu mitshetuat auassat tsheshkutamuakaniht tan etashtenit innu-aimunnu mak tan eshi-mashinataikannit. Mitshetishuat ashit innuat ka tshishkutamuakaniht tshetshi nitau-tshitapatahk mak nitau-mashinaitsheht.

Tshinuau ma, eshk^u a tshinishtutuauauat tshimushumuauat kie ma tshukumuauat eimitaui? Tanite shash neni passe aimuna apu shuk^u uitakaniti. Tshinishtutenau a neni aimuna : nipitshituan, neiau, kie ma nishkatishiun? Anutshish auassat kie ussinitshishuat kutakanu aimunnu apashtauat eimitaui. Mamen mishtikushiu-aimunnu, kakusseshiu-aimunnu kie ma akaneshau-aimunnu apashtauat, apu mesheku innu-aimunnu apashtaht.

E ma takuaki neni aimuna, atushkan-tshishikua, pishimuat, atishauiana, atshitashuna, mak mitshet kutaka. Mate : ushkat-atushkan, minashtakan, tshishe-pishim^u, epishiminishkueu, kamikuat (mikushiu, mikuau), kauasheshkunat (uasheshkunishiu, uasheshkunau), peik^u, nish^u, nisht^u, nishunnu, patetat-tatunnu, peikumitashumitannu, peikutshishemitashumitannu.

Anu minupannu mani tshetshi uitahk mishtikushiu-aimunnu, akaneshau-aimunnu, tanite apu mishta-tshinuapekashteti! (lundi, mardi, vert, rouge, un, deux, cent, mille…)

Nanitam ma ui minu-kanuenitamutau tshitaimunnu, tshishkutamatishutau kie ashineuatshetau mak ashu-minatauat anitshenat auassat, tanite minutakushu auass meshta-nitau-innu-aimiti.