Nutim etatiki aimuna, Innuat eshi-aimiht, apu ut mashinataikaniti ueshkat. Anitshenat Upishtikueiau-assit etaht Innuat miam mate : Abénaquis, Micmac, Mohawk, Cris kie kutakat etaht ute assit.
Ashu-patshitinakanipan innu-aimun muku tshiam e aiminanut, e tipatshimunanut mak e atanutshenanut. Eukuanat anitshenat kauapikueshiht ushkat mashinataimupanat nenua innua utaimunnua shash umenu neumitashumitannuepipuna utat eshpish, tanite ui tshishkutamatishupanat eshi-aiminiti innua tshetshi ashu-minaht aiamieunnu. Uinuau ushkat tutamupanat aimun-mashinaikana (dictionnaires) mak uitamatsheu-mashinaikana (grammaires).
Ekute uiapatakanit anutshish ka itashtet tshinanu tshitaimunnan: innu-aimun. Mishta-pessish etueht anitshenat atikamekunnuat ishinakuanishapan tshitaimunnan. Mate ushkat ishinakuanikupan k mak r ekue mishkutshipanit tsh mak l/n.
| Ne aimun chef | issishuenanishapan | ukimau |
| Eku ne quelque chose | issishuenanishapan | kekuan |
| Eku kutak toi | issishuenanishapan | kir |
Ekue mishkutshipanit minuat, neme ka apashtakanit k ekue mishkutshipanit miam tsh… miam mate :
| ukimau | ekue issishuenanut | utshimau |
| kekuan | ekue issishuenanut | tshekuan |
| kir | ekue issishuenanut | tshin |
Anitshenat Pessamit mak Mashteuiatsh ishi-uitamuat uinuau [utsimau], [tsekuan], [tsil].
Ne kutak kapapeikushtesht ka takuak anite aiamieu-mashinaikanit: eukuan ne r, anutshish apu takuak anite tshitaimunnat.
Mate:
| il vente | rutin |
| je suis content | niminueriten |
| c’est dur | ariman |
| moi | nir |
Mishkutshipanu nete eshi-aimiht anitshenat Innuat mak anitshenat Cris, eukuan eshku eshinakuannit uinuau atikamekunnuat. Anitshenat Cris ishinakuannu y eku innuat (Mashteuiatsh et Pessamit) mishkutshipannu l eku netshenat kutakat n.
Mate:
| Cris anutshish eshi-aimiht | yutin | ayiman | niminueyten | niy |
| Mashteuiatsh mak Pessamit eshi-aimiht | lutin | aliman | niminueliten | nil |
| Kutakat Innuat eshi-aimiht | nutin | animan | niminueniten | nin |
Mishkutshipanu tshitaimunnan, muku peikushinu nenu innuat utaimunuau mak ashit mishta-pessish takuannu nenua kutaka innua utaimunnu, miam anitshenat Cris eshinikatakaniht mate.