Tshekuan uet takuak ne ᵘ ka nimakuteshit (petit u en exposant) nete passe aimunit? Passe anite aimunit, takuan mani pietakuak tshekuan nete mashten, miam ne auen e putatitshet tshipa tshi ishitakuan. Miam ne mate : kaku uianakaniti nete mashten petakuan tshekuan, eukuan an uet takuak ne ᵘ ka nimakuteshit.
Meshinaitsheini, tanite uet tshi tshissenitamin anite tshe ashtain ne ᵘ ka nimakuteshit uesh apu kassinu ashtakanit anite aimunit. Takuan ne ᵘ ka nimakuteshit nete aimunit eshi-punipaniti mashten : k, m, t mak sh. Apu kassinu anite takuak ne ᵘ ka nimakuteshit nete aimunit, miam mate neni aimuna: mush… nishk… miam… patetat…
| …ku | …mu | …tu | …hu |
|---|---|---|---|
| kaku | atimu | nishtu | nishu |
| amishku | pishimu | tatu | |
| tutameku | tutamu |
Tan ishpish an tshe ashtet ne ka nimakuteshit ᵘ? Tshi mishaimini ne aimun, ka ishinikatakanit ishinikatamun kie ma aitun miam e mitshetiki tshekuana ishinakutaini, tshika uapaten ne takuaki u anite aimunit.
| aimun | mitshetuat + at (pluriel) | tshe itashtet aimun |
|---|---|---|
| mush | + at | mushat |
| nishk | + at | nishkat |
| mashku | + at | mashkuat |
| atiku | + at | atikuat |
| tutamu | + at | tutamuat |
Tshitapatamutau neni aimuna:
| anik / aniku? | anik apu takuak ᵘ ka nimakuteshit. E mitshetiht tshekuan itashtaini tshipa itashteu anikat. |
| minishtik / minishtiku? | minishtiku, ui itashtaini miam e mitshetiki tshekuana : tshika itashteu minishtikua |
| tshiashk / tshiashku? | tshiashku, itashtaini miam e mitshetiki tshekuana, tshipa itashteu tshiashkuat |
| mashinaikanashk / mashinaikanashku? | mashinaikanashku, itashtaini e mitshetiki tshekuana, tshipa itashteu mashinaikanashkuat |
| minush / minushu? | minush, apu takuak u ka nimakuteshit. Apu mitsheki aimuna ka punipaniti sh tekuak ᵘ ka nimakuteshit, miam ne nishu. |